پاکستانی سرحد پر بارودی سرنگ کے 3 دھماکوں میں کیپٹن سمیت 4 ایف سی اہلکار جاں بحق

مہر خبررساں ایجنسی نے ایکس پریس کے حوالے سے نقل کیا ہے کہ پاکستان کے علاقہ کرم ایجنسی میں سرحد کے قریب بارودی سرنگ کے 3 دھماکوں میں پاکستانی فوج کے کیپٹن سمیت 4 ایف سی اہلکار جاں بحق اور 3 زخمی ہوگئے ہیں۔  پاکستانی  فوج کے شعبہ تعلقات عامہ آئی ایس پی آر کے مطابق کرم ایجنسی کے علاقے پاک افغان خرلاچی بارڈر کے قریب بارودی سرنگ کے 3 دھماکے ہوئے، جس کے نتیجے میں کیپٹن سمیت 4 اہلکار جاں بحق  جب کہ 3 زخمی ہوگئے۔  زخمیوں کو اسپتال منتقل کردیا گیا جہاں انہیں طبی امداد فراہم کی جارہی ہے جب کہ جاں بحق فوجیوں کی میتوں کو پاراچنار روانہ کردیا گیا ہے۔ جاں بحق اہلکاروں میں کیپٹن حسنین، سپاہی سعید باز ، سپاہی قادر اور سپاہی جمعہ گل شامل ہیں جب کہ نائیک انور ،سپاہی ظاہر اور لانس نائیک شیر افضل زخمی ہیں۔